OM TE PRAAT, OF NIE TE PRAAT NIE

Met die jongste ontmoeting tussen Afrikaanse organisasies met die ANC, moes die NG Kerk homself ook afvra: Gaan ons, of gaan ons nie? Praat ons, of liewer nie? Gaan ons misbruik word, of nie? Sien ons onsself as 'n Afrikaanse organisasie?

Dis nie die eerste maal dat die NG Kerk ('n keer of wat alleen, maar meer kere al saam met ander groeperinge) met die ANC praat nie - of dan, deel was/is van 'n gesprek met die regerende party nie. Daar is ook al met ander politieke partye gesprek gevoer. Somtyds was dit op aandrang van die kerk. Ander kere, soos verlede week, op versoek van die ANC (en gefasiliteer deur Afrikaansprekende lede van die ANC).

In 'n goeie artikel hieroor haal Jan-Jan Joubert in Beeld (aangepas) vir Oscar Wilde aan: Die enigste ding wat erger is as om mee gepraat te word, is om nie mee gepraat te word nie. En, skryf hy tereg: Dit kan wel so wees dat mens se impak in so ’n opset beperk is, maar as jy wegbly, is jou impak nul. Daarom sal ons bly praat, net soos wat ons moet bly luister!

DEMOKRASIE WERK, MAAR NIE SO NIE!

Niemand kan 'n mens kwalik neem as die gewelddadige burgerlike konflik in die strate van Johannesburg hierdie week tussen Cosato en die DA tot groot verontrusting stem nie.

Burgerlike deelname aan die demokratiese prosesse in Suid-Afrika is deel van ons Grondwetlike reg. Sien ook "Ons Demokrasie werk (nog)" in argief. Maar, dan is dit nie net een faksie van die samelewing wat die reg tot vreedsame openbare protes/optogte vir hulleself kan/mag toeëien nie.

Cosato se gewelddadige weerstand teen die optog van die DA-jeug, uit protes teen Cosatu se teenkanting van die jeugsubsidie, hou NIKS goed in vir toekomstige, soortgelyke openbare protes nie. Dit lyk ook nie of die dissiplinere prosesse in die ANC-alliansie kan tred hou met die behoefte van die opbouende, plofbare spanning wat besig is om in die land te ontwikkel nie. En, so ook nie die vermoë van 'n polisiemag wat van topstruktuur gestremd is deur sprake van aandadigheid aan ernstige korrupsie en toesmeerdery van wandade nie.