WETENSKAP EN GODSDIENS NIE TEENOOR MEKAAR

Wilhelm Jordaan skryf in Beeld oor die voortdurende konflik-gesprek in die media oor wetenskap vs godsdiens: Die wetenskap "versamel feitelike kennis en formuleer teorieë oor die natuurlike wêreld. En toets voortdurend teorieë in ag genome nuwe feite. Evolusie en die ouderdom van die aarde is voorbeelde daarvan.

Gelowiges kan dit met verrukking en verwondering aanvaar as wetenskaplike waarheid wat aangevul en gewysig word soos wat kennis toeneem. Godsdiens vra egter ander vrae. Nie byvoorbeeld hoe oud die aarde is nie (dit is ’n wetenskaplike vraag), maar vrae soos: Waarom is daar iets pleks van niks? Waarom en waartoe die mens? Dit het te make met betekenis en singewing – ’n menslike impuls nét so sterk as die wetenskaps­begeerte om steeds meer van die natuurlike wêreld te weet.

Daarom vertel mense stories om geloofs- en lewenswaarhede uit te druk en te ervaar, byvoorbeeld Bybel-stories, Koran-stories en Talmoed-stories. Daarvolgens kan ’n mens dan met oortuiging sê: Ek glo in ’n God omdat dit sin gee aan my bestaan, want dit is vir my die beste antwoord op lewensvrae."

BEGROTING, MINISTER VAN LANDBOU VERSTOM BOERE

Mnr. Pravin Gordhan, minister van finansies, het gister in Kaapstad op ’n mediasessie voor sy begrotingsrede gesê die tolgeld sal van 30 April gehef word. Die verhoogde brandstofheffing sal van 4 April betaalbaar wees. Gordhan se begroting gaan Suid-Afrikaners in die hoër inkomstegroepe die hardste slaan en bevat ’n reeks verrassings. Sien LEES MEER.

Die begroting is positief ontvang in die media. Beide Beeld en Die Burger se hoofartikels beskryf dit as ’n toonbeeld van hoe gesonde staatsfinansies behoort te lyk. Lees meer by http://www.beeld.com/Opinie/HoofArtikels/Gordhan-se-voorbeeld-vir-die-res-20120222.

Intussen berig Volksblad dat verstomde landbouleiers op AgriSA se beleidskongres in Stellenbosch nie ’n snars kon uitmaak van wat die minister vir landbou probeer sê het nie. Die skakel na die berig is by LEES MEER onderaan.